អំណាចទឹកប្តូរនិស្ស័យ ! មិនត្រឹមតែមិនស្តាប់ ថែមទាំង...
ថ្ងៃអង្គារ ទី២៧ ខែធ្នូ ឆ្នាំ២០១៦ ម៉ោង ០៨:៥៧ (27-12-2016 08:57)
ខេត្តកណ្តាល ៖ បុរសម្នាក់ត្រូវបានសមត្ថកិច្ចចាប់ឃាត់ខ្លួនភ្លាមៗ បន្ទាប់ពីបុរសរូបនោះ បានវាយបំផ្លាញសម្ភារក្នុងផ្ទះ និងវាយឪពុកបង្កើតខ្លួនឯង ព្រមទាំងប្រុងដុតផ្ទះចោលទៀត ។ ហេតុការណ៍នេះកើតឡើងកាលពីវេលាម៉ោង៣ និង២៦នាទីរសៀល ថ្ងៃទី២៦ ខែធ្នូ ឆ្នាំ២០១៦ នៅផ្ទះជនរងគ្រោះជាឪពុកស្ថិតក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ។
យោងតាមរបាយការណ៍របស់សមត្ថកិច្ចបានឲ្យដឹងថា មុនពេលកើតហេតុជនសង្ស័យឈ្មោះ ហែម ចិត្ត្រា ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករ បានផឹកស្រាស្រវឹង ពេលមកដល់ផ្ទះវិញក៏រករឿងឡូឡា និងបានវាយបំផ្លាញសម្ភារៈក្នុងផ្ទះដោយគ្មានមូលហេតុ ។ ឃើញដូច្នេះ ជនរងគ្រោះឈ្មោះ ហែម ឡាំង ភេទប្រុស អាយុ៥៤ឆ្នាំ ជនជាតិខ្មែរ មុខរបរកសិករ ត្រូវជាឪពុកបង្កើត បានទៅឃាត់កូនឲ្យឈប់ឡូឡា តែកូនរមិលគុណរូបនោះមិនត្រឹមតែមិនស្តាប់ទេ ថែមទាំងស្ទុះទៅទាត់ឪពុក១ជើង ហើយច្រានទ្រូងថែមទៀត រួចហើយជនសង្ស័យបានកាត់ខ្សែភ្លើងប្រមូលខោអាវគរលើផ្ទះយកភ្លើងដុតផ្ទះបណ្តាលឲ្យឆេះរនាប និងបង្កការភ្ញាក់ផ្អើលដល់អ្នកជិតខាង និងសមត្ថកិច្ចប៉ុស្តិ៍ចុះមកអន្តរាគមន៍ឃាត់ខ្លួនជនសង្ស័យយកទៅប៉ុស្តិ៍ដើម្បីសួរនាំ ។
របាយការណ៍បញ្ជាក់ទៀតថា នៅពេលសមត្តកិច្ចនាំទៅដល់ប៉ុស្តិ៍ ជនសង្ស័យបានរត់ទៅវាយឪពុក១ដៃបណ្តាលឲ្យប៉ោងភ្នែកខាងស្តាំទៀតផង ។
បច្ចុប្បន្ន ជនសង្ស័យត្រូវបាននគរបាលប៉ុស្តិ៍កំពង់ស្វាយកសាងសំណុំរឿងបញ្ជូនទៅអធិការដ្ឋាននគរបាលស្រុកកៀនស្វាយ ដើម្បីចាត់ការបន្តតាមនីតិវិធីច្បាប់ ៕
No comments:
Post a Comment