រន្ធត់ ! លឿនដូចគ្នា បុកគ្នាពេញទំហឹង ស្លាប់ម្នាក់
ថ្ងៃសុក្រ ទី២៣ ខែធ្នូ ឆ្នាំ២០១៦ ម៉ោង ០៩:២៤ (23-12-2016 09:24)
រាជធានីភ្នំពេញ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងកាលពីវេលាម៉ោង៧យប់ ថ្ងៃទី២២ ខែធ្នូ ឆ្នាំ២០១៦ រវាងម៉ូតូ២គ្រឿងនៅតាមបណ្តោយផ្លូវជាតិលេខ៦ ក្បែរស្ពានទី៣ ស្ថិតនៅក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ បណ្ដាលឲ្យស្លាប់ម្នាក់ របួសធ្ងន់ម្នាក់ ស្រាលម្នាក់ ។
ជនរងគ្រោះដែលស្លាប់នៅកន្លែងកើតហេតុឈ្មោះ សំអាត ម៉េងគាង អាយុ២៣ឆ្នាំ មុខរបរកម្មករសំណង់ ស្នាក់នៅភូមិខ្ទរ សង្កាត់ព្រែកលៀប ខណ្ឌជ្រោយចង្វារ មានស្រុកកំណើតនៅកន្លែងកើតហេតុតែម្តង ។
សាក្សីដែលឃើញហេតុការណ៍សុំមិនបញ្ចេញឈ្មោះបានឲ្យដឹងថា មុនពេលកើតហេតុតាមបណ្តោយផ្លូវជាតិលេខ៦ក្បែរកន្លែងកើតហេតុមានការដ្ឋានជួសជុលផ្លូវបានបិទផ្លូវមួយចំហៀងខាងធ្វើដំណើរពីបណ្តាខេត្តចូលមកភ្នំពេញ ដោយបើកឲ្យធ្វើចរាចរណ៍តែម្ចាងទាំងទៅទាំងមក ធ្វើឲ្យផ្លូវតូចចង្អៀត ស្របពេលនោះជនរងគ្រោះដែលស្លាប់ជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1BS-1728 តាមបណ្តោយផ្លូវជាតិលេខ៦ក្នុងទិសដៅពីជើងទៅត្បូង ជិះវៀងផ្លូវបានបើកបញ្ច្រាសទិសដៅចរាចរណ៍ រីឯម៉ូតូ១គ្រឿងទៀតម៉ាកស៊ុយស៊ីគី Nex ពណ៌ស ពាក់ស្លាកលេខ ភ្នំពេញ 1FS-1778 ជិះគ្នា២នាក់ តាមបណ្តោយផ្លូវជាតិលេខ៦ក្នុងទិសដៅពីត្បូងទៅជើង លុះមកដល់ចំណុចខាងលើម៉ូតូទាំង២គ្រឿងបើកលឿនដូចគ្នាបានរេចង្កូតបុកគ្នាពេញទំហឹងបណ្តាលឲ្យអ្នកជិះម៉ូតូបញ្ច្រាសទិសដៅចរាចរណ៍ដួលបោកក្បាលស្លាប់ភ្លាមៗនៅកន្លែងកើតហេតុ ចំណែកអ្នកជិះម៉ូតូនិចរងរបួសធ្ងន់ម្នាក់ និងស្រាលម្នាក់ រីឯម៉ូតូទាំង២គ្រឿងខូចខាតស្ទើរទាំងស្រុងដូចគ្នា ។
ក្រោយពេលកើតហេតុ រថយន្តសង្គ្រោះនៅជិតកន្លែងកើតហេតុបានដឹកយកជនរងគ្រោះដែលរងរបួសធ្ងន់យកទៅព្យាបាល រីឯម៉ូតូទាំងសងខាងវិញត្រូវសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ជើងគោក ចំណែកសត្រូវសាច់ញាតិដឹកយកទៅធ្វើបុណ្យនៅផ្ទះក្បែរកន្លែងកើតហេតុតាមប្រពៃណី ៕
No comments:
Post a Comment